One bill wey wan make dem establish ranches and stop open grazing for everywia for di kontri don pass second reading for senate afta plenti argument.
Di upper house for di National Assembly pass di bill for second reading on Wednesday afta Titus Zam, di senator wey dey represent Benue North-west, lead di debate on top am.
Nigeria don dey face kasala between farmers and herders for many years now.
As Zam dey lead di debate on top di law wey dem call ‘A Bill for an Act to establish National Animal Husbandry and Ranches Commission for di regulation, management, preservation, and control of ranches throughout Nigeria; and for connected purposes, 2024’, im say if dem ban open grazing at all, e go stop di kasala between herders and farmers.
Di Benue senator say make dem establish ranches for states wey get pastoralist communities.
But some Northern senators no gree wit wetin Zam tok.
Danjuma Goje, senator wey dey represent Gombe central, say make dem no establish ranches for only states wey get herders.
Goje argue say dem no suppose make laws for only some set of pipo.
“We suppose get mind wey big well-well and no go lock dem for one place. Dat one no go solve di problem,” na wetin im tok.
“Dis pipo na Nigerians and dem no dey benefit from anytin, dem no dey benefit from school, hospitals, or anytin at all.”
As im dey kick against di bill, Kawu Sumaila, senator wey dey represent Kano central, say some tins dey wey dey cause di kasala between farmers and herders wey dem neva address.
“Make we bring sometin wey dey more better and go protect di interest of everybody,” na wetin Sumaila tok.
“Plenti reasons dey wey dey make herders dey fight farmers and we suppose look inside dem. E dey against di constitution, and we go fight am till di end.”
As im dey support di bill, Enyinnaya Abaribe, senator wey dey represent Abia south, say farmers for di kontri dey under threat.
“Na dis one dey make Nigeria face food wahala,” Abaribe tok.
Barau Jibrin, deputy senate president, say make dem pause di bill so dat dem go fit tok more on top am, but Zam no gree move motion for dat one.
Di bill come pass afta di Senate President, Godswill Akpabio put am for voice vote.