My people, tori don land say di new Govnor of Rivers State, Siminalayi Fubara, don cancel di 10,000 work for civil service wey im predecessor, Nyesom Wike, bin don approve before. Oga Fubara come talk say dem go start to dey find new people to give work.
Before Wike comot office, e bin make sure say dem give plenty youths work immediately to fill di space wey dey for di state workforce.
But for one meeting wey Fubara do with stakeholders for Port Harcourt on Friday, e come open mouth say e stop di recruitment because e get as e be and di people wey dey in charge no do am well.
Fubara come promise say dem go start anoda process wey go dey transparent, e say e dey pain am say as dem check di names wey dem choose from di 23 local goment areas, dem come see say some people just add dia own people sake of politics.
As e dey answer one question, di govnor talk say, “I sabi say na di first question be dat, di ten thousand work matter. Wen we enta office, we don already get details of di names from di 23 local goment areas.
“You go agree with me say wen we check dose names well well, most of dem, like 60 percent sef, don pass di age wey dem suppose get. Na names of people wey odas just bring for political patronage.
“But wetin we dey tok about today na work for di future. Me sef, afta I don analyze dose tins, I say ‘How you go take employ somebody wey don reach 52 years as civil servant?’
“How many years di pesin go come work before e retire?”
Fubara still tok say im goment still get strong agreement with di people of Rivers State, and e still talk about how important am to dey govern well well.