Di Independent Petroleum Marketers Association of Nigeria (IPMAN) don yarn say dem go sidon with Dangote Refinery people dis week to yarn about how dem go dey lift fuel direct and how dem fit reduce di price.
IPMAN spokesperson, Chief Chinedu Ukadike, na im blow dis whistle. E say im people dey excited say dem go soon start to dey lift Dangote fuel direct-direct.
According to am, even though Dangote don start to dey share fuel, e still be like say to share fuel well-well for dis our country still be like magic.
“We get meeting wey we don plan with Dangote dis week. We happy say Dangote don open eye to see say oda people fit help dem share dia fuel too.”
“Dem don start to dey give major marketers and we dey hope say as time dey go, dem go start to give independent marketers too,” na so Chief Ukadike talk am.
Dis tori dey come as NNPC filling stations and oda independent filling stations dey sell fuel between N950 and N1,100, depending on where you dey for di country, after dem don lift Dangote fuel.
Meanwhile, di Crude Oil Refiners Association of Nigeria (CORAN) don beg Nigerian Government make dem fix dollar for N1000. Dem say if government do dis one, e go make Dangote fuel price fall below N600 per litre.