Di All Progressives Congress for Igbotako Ward II, Okitipupa Local Government Area of Ondo State don suspend di senator wey dey represent Ondo South, Jimoh Ibrahim.
Dem say di senator dey do anti-party activities.
Na for inside statement wey 29 executive members of di party sign on Wednesday, including di chairman and secretary for di ward, Oga Adetokunbo Adetola and Sola Omotoye na im dem talk am.
Di excos, for inside statement wey dem title ‘APC suspends Senator Jimoh Ibrahim Folorunso sake of insubordination and anti-party activities’, talk say na for dia meeting dem take di decision.
Di statement read, “We, di members of di APC Executive Committee of Igbotako Ward II for Okitipupa Local Government Area of Ondo State, do meeting on Monday, May 13th, 2024. For inside our meeting, we yarn well-well about different tins wey dey affect how our party dey progress and develop, especially indiscipline and insubordination among some members.
“We don see say wetin Senator Jimoh Ibrahim dey do no follow wetin dey for di party constitution, especially as im carry di party go court and dey do anti-party activities. Sake of dat one, we don decide to take action against am as e dey for di party constitution. Senator Jimoh Folorunso Ibrahim dey suspended from APC with immediate effect sake of insubordination and anti-party activities according to Article 21, Section A of APC Constitution.
“E good make we remember say di National Party Chairman of APC, Alhaji Abdullahi Umar Ganduje, meet with all Ondo State governorship aspirants on April 25th, 2024, for Abuja. For dat meeting, im beg dem make dem cooperate with di party candidate and di current Governor of Ondo State, Honorable Lucky Orimisan Aiyedatiwa. But Senator Jimoh Ibrahim Folorunso no gree, instead im carry Governor and APC go court, im no follow wetin party talk at all. E no stop dia, im still dey do anti-party activities as im dey tell im supporters for Igbotako and Ondo State make dem join NNPP, say im go soon collect governorship ticket from dem. Senator Jimoh don already talk am say im wan scatter APC before im comot for di party, as we fit see from wetin im do for Federal High Court for Abuja and how im take dey yab APC for different media dem.”