Rivers State Governor, Siminalayi Fubara, don cry out say im inherit big debt from de former governor, Nyesom Wike. Im say plenty projects wey dem bin do ceremony for no even get complete money.
Governor Fubara yarn dis one wen im dey do opening ceremony for Aleto-Ogale-Ebubu-Eteo Road, wey dem dey call Old Bori Road for Eleme Local Government Area. Na Abia State Governor, Alex Otti, come do de opening ceremony.
Fubara say de contractors wey do dose projects don dey come back dey ask for de remaining money wey dem never pay dem. But im no talk how much de debt be.
Im say na because im enemies dey push am na im come dey talk about am now. Governor Fubara say from now on, wen im wan go do opening ceremony, im go carry “white paper” wey go show how dem take fund de project.
Governor Fubara clear mouth say im no get any wahala with federal government, say dem even dey support am, but say na insider dey give am challenges.
Im say im bring Alex Otti come do de opening ceremony because im wan follow better people wey dey progressive.
For im own side, Otti praise Fubara for de work wey im dey do for Rivers State. Im say Fubara dey show true leadership because true leadership na to serve de people, no be to serve small group of people.
Otti say since Fubara don work for Peter Odili and Rotimi Amaechi government before, im come prepared well-well. Im believe say Fubara no fit dey distracted by de polical wahala for Rivers State.
Im still talk say na God get power and no human being fit give power, except if de person fit give life too.
De reason why dem fix de Old Bori road be say people go fit use am instead of de East West road wey don spoil for Eleme side.