Some ogbonge Northern leaders don tell President Bola Tinubu and di oda leaders for National Assembly say make dem no gree make United States and French goment relocate dia military base from Sahel come Nigeria.
For one open letter wey dem write, di leaders say make federal goment no bow to dat kain pressure at all.
Di pipo wey sign di letter na Professor Abubakar Siddique Mohammed from Centre for Democratic Development, Research and Training (CEDDERT), Zaria; Professor Kabiru Sulaiman Chafe, wey be former Minister of State for Petroleum Resources, wey dey represent Arewa Research and Development Project (ARDP), Kaduna; Professor Attahiru Muhammadu Jega, wey be former oga for Independent National Electoral Commission (INEC); Professor Jibrin Ibrahim from Centre for Democracy and Development (CDD), Abuja; Auwal Musa (Rafsanjani) of Civil Society Legislative Advocacy Centre (CCISLAC) Abuja; and Y. Z. Ya’u from Centre for Information Technology and Development (CITAD), Kano.
According to di letter, American and French goment don dey allegedly pressure Nigeria well well, join oda Gulf of Guinea kontris, make dem sign new defence pact wey go allow dem bring back dia sojas wey dem don pursue comot from Mali, Burkina Faso and Niger.
Di pipo wey sign di letter worry say Nigeria, wey be di most important kontri for Gulf of Guinea, fit gree for dis pressure, and e fit spoil dia defence and security mata.
“Di way dem recently pursue French and American troops comot from Niger sake of say dem no dey effective dey raise questions about how e dey good to allow foreign military base”, na wetin di citizens tok for di open letter.
Dem still argue say di main reason why dem establish dose bases, wey be to fight terrorism for Sahel, neva work at all, as terrorism don even worse well well since dem establish dose camps.
“E dey important to tok am well say hosting foreign troops dey always bring wahala and e no dey bring any gain at all.
“Di way wey American operations for Niger Republic bin dey, for example, na to stop terrorists for Sahel region. But di result so far no too dey impressive at all, e be like say e don fail completely.
“E don clear say di way American troops and oda intelligence pipo dey for Niger Republic no dey serve any beta purpose. Dis na because terrorism no reduce at all, instead e don worse well well since US start dia operations for di region,” na wetin dem tok.
Dem still warn say make Nigeria no spoil dia sovereignty and independence sake of small time strategic alliance wey fit bring big wahala for future.
Dem add join say wen foreign troops dey stay for one place, e dey always make di price of tins for dat area cost well well, and na poor pipo e dey affect pass.
“For environment mata, to dey build and operate military base fit cause plenti damage for di area. Tins like to cut trees anyhow, erosion for soil, water pollution, and e fit kill many plants and animals, and all dis one no good for farmers and pipo wey dey live for bush. Di kain damage wey e go cause for environment fit still spoil economic opportunities and development wey go tey,” na wetin dem tok.
Di presidency and National Assembly neva tok anytin for public about di open letter.