Former Vice President, Atiku Abubakar don accuse President Bola Tinubu well well ontop how im dey handle di mata of fuel subsidy.
For inside one statement wey Atiku release on Wednesday for Abuja, im claim say Tinubu govment still dey secretly pay fuel subsidy, even afta dem don tell Nigerians say dem don stop am.
According to Atiku, wey contest di 2023 Presidential election under di Peoples Democratic Party (PDP), di govment go spend like ₦5.4 trillion on top subsidy for Premium Motor Spirit (petrol) for 2024 alone.
Dis one dey different from wetin President Tinubu tok for public, wey be say im govment don stop to dey pay any subsidy at all.
“Tinubu govment must to stop to dey deceive Nigerians and make dem dey clear about dia policies,” na wetin Atiku tok.
Im tell di President make im match wetin im dey tok for public wit wetin im dey do, especially for mata wey concern fuel subsidy, wey dey affect how Nigerians take survive.
Dis one dey happun as Nigerians dey look di govment well well ontop how dem dey run di economy, as tins cost well well and pipo still dey argue about subsidy matter.
Atiku say, “President Bola Tinubu, wen dem swear am in on May 29, 2023, im announce say im don stop di subsidy on top PMS, wey pipo sabi as fuel.
“Since den, Tinubu and im govment pipo don dey brag about am.
“I bin don tok for my statement wen I dey review di one year wey Bola Tinubu don do, say make di govment clear us well well about dia subsidy policy.
“Dis na exactly wetin I tok: “…make una clear us about di fuel subsidy matter, including how much una dey spend and wetin una don gain from di fuel subsidy reform and how e take affect di Federation Accounts.
“E dey surprise me say since April 2024, fuel queue don long well well for plenty filling stations for Nigeria, and di ‘black market’ don plenty for many states.
“How much PMS dem dey import and share, and how much e dey cost? Wetin be di subsidy wey dem still dey pay?”
“If before, dem no dey clear us about di subsidy mata, wetin we go come tok about now wey dem still dey pay subsidy for secret and Nigerians no sabi?
“Like plenti oda Nigerians, I shock wen I hear from media report say “govment still dey support downstream consumption.
“Now we don sabi say dem fit spend reach N5.4 trillion on top fuel subsidy for 2024, pass di N3.6 trillion wey dem spend for 2023, di same year wey Tinubu claim say im don stop fuel subsidy.
“I wan tok again say Nigeria no dey work, and wetin we don see for inside one year na different different economic policies wey dem just dey try anyhow. To dey pay subsidy and lie about am no be sometin to dey brag about. Nigerians deserve beta tin pass dis kind lie-lie.”
