One of di ogbonge fintech company dem for Naija, OPay, don warn dia customers make dem no dey trade cryptocurrency or any oda virtual currency for dia app.
For di notice wey di company release on Friday, dem say dem go block any account wey dem catch dey do dat kain trading and dem go still send di details of di pesin wey get di account go give regulator.
Dis one dey happen as Central Bank of Nigeria (CBN) dey shine dia torch well well on top fintech companies for di kontri. Before dis one sef, CBN bin don tell OPay, Moniepoint, Palmpay, and Kuda Bank make dem stop to dey bring new customers.
For di notice, OPay talk say “As we dey follow wetin CBN tok, abeg make una take note say OPay no gree for any cryptocurrency and all dose virtual currency trading. Any account wey dey do dat kain tin, we go close am and we go share di customer information give authorities wey dey regulate dis tins.”
“Abeg make sure say your account no involve any cryptocurrency or any oda virtual currency transaction,” na so di company warn.
Di warning wey OPay give dey come as tori land say Nigeria National Security Adviser (NSA) don put crypto trading for di list of tins wey fit worry di kontri security. According to di oga patapata for Moniepoint, Tosin Eniolorunda, dis one mean say new crypto regulation dey come wey go stop peer-to-peer trading of cryptocurrency dem.
E still mean say di fintech companies dem must to dey report any account wey dem see say dey trade crypto give NSA through dia regulator, wey be CBN.
E be like say di wahala for crypto market neva end for Naija o. Make we dey watch wetin go happen next.
