One 26-year-old man wey dem dey call Tanaka Maringire don kill im friend just because say im no gree share beer give am. Dis tin wey happen don make dia community shock well well.
Di man wey come from Chief Chikwanda area for Masvingo, Zimbabwe, dem don carry am go Masvingo Magistrates Court on top accuse of murder, just as e dey for Section 47 of di Criminal Law Codification and Reform Act.
Di tin happen for May 11, 2024. As dem talk am, Maringire bin dey drink beer for one bar wey dey Rumwanda business centre for Masvingo, with im friend wey don die now, Jefrees Mukonzi, and oda friends like Tichaona Makuvisa and Philmon Mugovera.
Makonzi bin don buy beer and e dey share am with Maringire. But as di beer finish, Makonzi no gree continue to share again, and dis one vex Maringire well well. As Maringire wan avoid wahala, e come dey play snooker.
Tichaona Makuvisa mistakenly touch di snooker table, and dis one provoke Maringire. Maringire come use cue stick jab Makuvisa. Makonzi try to calm di matter, but dis one just dey make Maringire dey vex more.
As Maringire dey vex, e grab one plank from broken chair and e strike Makonzi three times for im forehead. Afta di attack, Makonzi comot from di bar dey complain of pain wey dey im head and arm. E no tey, e collapse for outside.
Makonzi friends quickly run go help am, try to carry am go house. But e collapse again. Even as dem try to wake am with water, e no gree wake. Dem come call im mama, and im mama rush am go Chipinda Clinic. From dia, dem transfer am go Masvingo Provincial Hospital, and na dia dem pronounce am dead.
Dem don remand Maringire for custody, and di case go continue for May 29, 2024. E be like say di court go tell us more about wetin really happen and if na true say na Maringire kill Jefrees Mukonzi.
