President Bola Tinubu don tok say Nyesom Wike, Minister of di Federal Capital Territory (FCT), don stop to dey dance and sing, but im still dey perform well-well.
Di President yarn dis one wen im dey commission di extension of di Inner Southern Expressway (ISEX) and di Outer Southern Expressway (OSEX) to di Southern Parkway, wey pipo sabi as Goodluck Ebele Jonathan Expressway, for Abuja, on Wednesday.
Vice-President Kashim Shettima wey represent Tinubu, also praise Wike appointment as FCT minister say na one of di best political appointment since dis current democracy start for di kontri.
Im say; “Dis commissioning wey we dey do today na di fourth road wey don complete wey we don proudly open for di Federal Capital Territory, and all of dem dey executed in less than one year. I dey very happy wit His Excellency Barrister Nyesom Wike and im team for dia dedication and hard work to make dis road happen. Dis roads na proof of our administration vision for modern, prosperous and inclusive Federal Capital.
“One year ago, I bin promise to make infrastructure transformation our priority, as I know say na through am our economy dey thrive and our pipo dey connect. Di extension of di ISEX no be just about road, e dey symbolize connectivity, accessibility and opportunity. E show say we dey determined to bridge di gap between urban and rural areas, to make sure say development no just dey for city centres, but e go reach every corner of our great nation.
“But make we no forget say dis na just one of di many projects wey don complete for di FCT. We still get plenti oda strategic projects wey dey pipeline, and each one dey designed to address di needs of our Federal Capital, from upgrading infrastructure wey dey ground, to starting new projects, we dey lay ground for better future.
“As we dey celebrate dis achievement, e dey important to appreciate di efforts of di FCT Minister, Chief Barrister Ezenwo Nyesom Wike and im team, and all di stakeholders wey dey involved, including private sector partners.
“As I tok di last time, Wike na force of human nature. Love am or hate am, but you no fit ignore am. Because every time, im dey try to redefine wetin leadership mean.
“Wike na one of di best appointments wey dem don ever make for dis current democracy for dis kontri, and we gats commend Mr. President for di vision, wisdom, and courage to appoint Barrister Nyesom Wike as di Minister of di FCT.
“Pipo bin dey protest well-well wen dem first mention im name, but I believe say all my brothers and sisters wey bin oppose im appointment now dey hail am.
“Im be ogbonge leader wey all of us suppose copy. Na very strong partner, unfortunately, leadership don reduce im tempo. Di whole political space get pipo wey dey careful, but now im don stop to dey dance, im don stop to dey sing, but im still dey perform. For di coming months and years, we go continue to make infrastructure development our priority for our Renewed Hope Agenda. We still dey committed to deliver on our promises, to empower our pipo, and to build nation wey all of us go dey proud of.”
