Israel don launch heavy attack on top Iran on Friday, as dem say dem bomb Iran nuclear facilities, ballistic missile factories and military commanders. Dem talk say na the beginning of long operation wey go stop Tehran from build atomic bomb.
As e happen, Iran sef vex, launch like 100 drones go Israel side to retaliate. Israeli military spokesman, Brigadier General Effie Defrin, confirm say dem dey work to shoot the drones down.
People wey dey Iran and their local media report say heavy explosion shell everywhere, even reach their main uranium enrichment plant for Natanz. Israel come declare state of emergency as dem dey expect Iran missile and drone retaliation.
International Atomic Energy Agency (IAEA) yarn say no radiation leak dey for the Natanz nuclear site based on wetin Iranian authorities tell dem.
Iran elite military group wey dem dey call Revolutionary Guards talk say their oga patapata, Hossein Salami, don kpai for the attack. Their state media talk say their headquarters for Tehran chop missile too. Dem even talk say some children die as missile touch residential area for capital.
Israeli Prime Minister, Benjamin Netanyahu, for video message talk say, “We dey for critical point for Israel history. Just now-now, we don start Operation Rising Lion — targeted military operation to stop Iran threat. We go continue till we finish dem.”
Defrin still talk say 200 Israeli fighter jets join the strike and dem bomb over 100 targets inside Iran.
He confirm say the Iranian Armed Forces chief of staff, the commander of Revolutionary Guards, and the commander of Iran Emergency Command all kpai for the attacks.
Iran Supreme Leader, Ayatollah Ali Khamenei, vex say Israel don show evil hand, call am crime, and swear say bitter punishment dey come for them.
Airlines wey dey pass Israel, Iran, Iraq and Jordan airspace sharply comot, as data from Flightradar24 show how flights dey divert and cancel to protect people.
Iran close their airspace, and Tel Aviv Ben Gurion Airport sef shut down till further notice.
U.S government talk say dem no get hand for the matter, even though this one don raise tension level for Middle East wey be one of the main oil supply region for the world.
Apart from air strikes, Israel Mossad spy people carry secret sabotage mission inside Iran, target their strategic missile sites and air defence system — na Axios report am.
Iran state media still report say Israel don kill at least two nuclear scientists — Fereydoun Abbasi and Mohammad Mehdi Tehranchi — for Tehran. In total, dem say six nuclear scientists don kpai.
National Iranian Oil Refining and Distribution Company talk say their oil and storage facilities no collect damage and work dey go on.
Israel military Chief of Staff, Eyal Zamir, talk say tens of thousands soldiers don enter alert mode across all borders.
He yarn say, “This one na historic fight wey never happen before. E critical to stop enemy wey wan wipe us out.”
