Super Eagles midfielder Christantus Uche don turn serious transfer tori this summer, and e fit soon waka comot from Getafe.
Uche, wey just join Getafe from Spanish third division club Ceuta last summer for just €500k, enjoy correct debut season for La Liga.
Di Super Eagles star quickly turn important player for Los Azulones as he deliver 4 goals and 6 assists inside 33 matches. Na so him market value waka from €500k go €15 million, over 2,900% increase.
As e dey like this, different clubs for Europe don dey eye Uche. Early this year, clubs like Chelsea and West Ham bin dey interested but di tori later calm down.
Now, clubs like Everton, Sunderland and Atletico Madrid don enter di matter. But according to latest reports, na Atletico Madrid don make serious move. Transfer expert Ekrem Konur reveal say Los Colchoneros don open talk with Getafe to sign di Super Eagles star.
Even though Uche market value na €15 million, Getafe dey expect at least €20 million before dem go release am.
Di reason wey make Atletico Madrid dey rush di deal be say dem need to rebuild dia midfield sharp sharp, as most of dia attacking midfielders don old or dem no dey perform again.
Dem need better players wey go help dem fight clubs like Real Madrid and Barcelona for league next season.
Christantus Uche dey fit di kind high-energy and intense style wey Diego Simeone like. Him strong temperament go make am blend well for Atletico Madrid setup.
If di deal click, e go be serious upgrade for Uche career. For di next few days, we fit hear something solid about di transfer.
Make we no forget say Uche just make him Super Eagles debut last month for di 2025 Unity Cup. He play against Jamaica for final, then follow play against Russia last week. He perform well for both matches.
