Three-time UEFA Champions League winner dem, Manchester United, dey reason to sign Super Eagles and Leicester City midfielder, Wilfred Ndidi.
Di 28-year-old defensive midfielder don play over 300 matches for Leicester City, score 18 goals, give 22 assists, and win FA Cup plus EFL Championship trophy with dem.
After Leicester dem relegate go Championship, Ndidi don ready to comot from King Power Stadium, and reports say e go dey available this summer for around £9 million.
According to transfer guru Ben Jacobs, Man United dey monitor how Ndidi matter dey go, as dem dey find experienced midfielder wey no go cost too much. Ndidi get experience wey Kobbie Mainoo never gather and e still get di kind physical strength wey old Casemiro no fit provide again.
But dem no be di only team wey dey eye di Nigerian midfielder, as Atletico Madrid and Everton too dey interested to carry di former KRC Genk star.
Even former Man United striker, Ruud Van Nistelrooy, don praise Ndidi performance before for Old Trafford against United.
By di time January transfer window go open, Ndidi go don reach 29, and chance to play for big club like Manchester United no dey come every time.
If di move happen, Ndidi go become di second Nigerian wey don wear Man United jersey after Odion Ighalo.
Ndidi get di kind quality wey fit make am play for any Premier League team, and him fit play both midfield and defence. With di cheap price and e moderate salary demand, this deal make plenty sense for Man United.
